ABŞ-ın hərbi təyyarələri Avropa bazalarına yerləşdirilir: Hədəf İran ola bilər

 Beynəlxalq kəşfiyyat mənbələri və aparıcı KİV-lər ABŞ-ın Avropadakı hərbi bazalarında qeyri-adi aktivliyin başladığını xəbər verir. Məlumata görə, ABŞ Hərbi Hava Qüvvələrinə məxsus çox sayda strateji təyyarə kütləvi şəkildə Almaniya və Britaniyadakı bazalara göndərilib.

 Britaniyanın RAF Feyford bazasına xüsusi əməliyyatlar üçün nəzərdə tutulmuş AC-130J Ghostrider təyyarələri və C-17 Globemaster nəqliyyat vasitələri eniş edib. Bu hərəkətliliyin yüksək riskli nöqtəli əməliyyatlar həyata keçirən xüsusi təyinatlı hava bölmələri ilə əlaqəli olduğu bildirilir.

 Son 48 saat ərzində onlarla KC-135 Stratotanker yanacaqdoldurma təyyarəsinin Avropa üzərindən Yaxın Şərq istiqamətinə hərəkəti radar qeydlərinə düşüb. Bu, genişmiqyaslı və uzunmüddətli hava əməliyyatına hazırlıq siqnalı kimi qiymətləndirilir.

Ekspertlər bu addımı ABŞ-ın İrana qarşı sərtləşən mövqeyi ilə əlaqələndirirlər. Bildirilir ki, əgər Tehran rejimi daxildəki etirazları qanla yatırmağa davam edərsə, Vaşinqton İranın strateji hədəflərinə qarşı sürətli hərbi müdaxilə variantını masada saxlayır.