Bakı metrosunda inqilabi dəyişiklik: Məsafəyə görə ödəniş sistemi gəlir

Bakı Metropoliteni QSC-nin Maliyyə departamentinin rəisi Kamal Hüseynli yanvarın 7-də (2026) verdiyi rəsmi açıqlamada sərnişinlər üçün mühüm yeniliklərin anonsunu verib. Hazırda vahid tarif modeli tətbiq olunsa da, gələcəkdə sərnişinin qət etdiyi məsafəyə və zonaya görə ödəniş edəcəyi diferensial tarif sisteminə keçid planlaşdırılır.

 Departament rəhbəri bildirib ki, tarif islahatlarının əsas məqsədi gəlir toplamaq deyil, xidmətin təhlükəsizliyini və dayanıqlılığını təmin etməkdir. Bu çərçivədə işarəvermə və enerji sistemləri tamamilə təkmilləşdiriləcək, stansiyalarda sərnişinlərə göstərilən xidmət keyfiyyəti yeni səviyyəyə qaldırılacaq.

Yeni fəaliyyət planına əsasən, xətlərdə hərəkət edən qatarların sayı 34 cütə çatdırılacaq. Bu, pik saatlarda qatarlararası intervalın rekord həddə — 1 dəqiqə 45 saniyəyə qədər endirilməsinə imkan verəcək. Beləliklə, sərnişin sıxlığının idarə olunması daha çevik və səmərəli şəkildə həyata keçiriləcək.

 2026-cı il üçün metropolitenin dövlət büdcəsindən subsidiya asılılığının azaldılması və orta müddətli dövrdə özünü maliyyələşdirmə modelinə keçidi hədəflənir. Görülən işlərin nəticələri qurumun növbəti maliyyə hesabatlarında sərnişinlərin və ictimaiyyətin diqqətinə çatdırılacaq.