Kiyev Brüsselə şərt qoydu

Ukrayna Avropa İttifaqına (Aİ) kənd təsərrüfatı məhsullarının Avropa bazarına çıxışına məhdudiyyətlər nəzərdə tutan üzvlük modelinə razı deyil.

Milli Söz xəbər verir ki, bu barədə oktyabrın 6-da Ukraynanın kənd təsərrüfatı naziri Taras Visotski "Politico" nəşrinə müsahibəsində bildirib.

"Bizim üçün keçid dövrü ilə daimi məhdudiyyətlər arasında prinsipial fərq var. Ukrayna birinciyə hazırdır. İkincisi isə Avropa İttifaqına tamhüquqlu üzvlüyün məntiqinə zidd olardı", — deyə nazir vurğulayıb.

Bir gün əvvəl Avropa Komissiyası Aİ-nin gələcək genişlənməsinə hazırlıq çərçivəsində həssas kənd təsərrüfatı məhsulları üçün maliyyə dəstəyini və bazara çıxışı əhəmiyyətli dərəcədə məhdudlaşdırmağı təklif edib. Bununla belə, Brüssel Ukrayna məhsullarının ənənəvi ixrac bazarlarına, o cümlədən Afrika və Yaxın Şərq ölkələrinə qayıtmasına kömək etmək niyyətindədir.

Visotski Kiyevin keçid dövrləri ilə razılaşmağa hazır olduğunu, lakin onların dəqiq müəyyən edilmiş müddətə malik olmalı olduğunu qeyd edib. O, həmçinin Ukraynanın yalnız Avropa fermerləri üçün təhlükə kimi görülməməli olduğunu bəyan edib.

"Məqsədimiz Avropaya yalnız taxıl və digər xammal deyil, həm də heyvan yemləri, inqrediyentlər, emal olunmuş məhsullar və bioyanacaq satan sektorla üzvlüyə nail olmaqdır", — deyə Visotski əlavə edib.

Nazirin sözlərinə görə, Ukrayna Aİ-yə üçüncü ölkələrdən gübrə, soya və lizin idxalından asılılığı azaltmağa kömək edə bilər, həmçinin Avropa istehsalçılarına Qara dəniz vasitəsilə ixrac marşrutlarına daha geniş çıxış təmin edə bilər.