Türkiyə və Pakistan Səudiyyə Ərəbistanında qoşun yerləşdirəcək

Türkiyə və Pakistan Səudiyyə Ərəbistanında hərbi kontingent və texnika yerləşdirəcək. Oktyabrın 5-də Məkkə Alyansının Strateji Siyasi və Müdafiə Komitəsinin iclasının yekunlarına dair Pakistan Xarici İşlər Nazirliyi bu barədə rəsmi məlumat yayıb.

"Komitə kollektiv müdafiə sahəsində öhdəliklərin praktiki icrasına dərhal başlamaq, həmçinin təsdiqlənmiş razılaşmalara uyğun olaraq razılaşdırılmış hərbi kontingentlərin və vasitələrin təmin edilməsi və onların Krallıq ərazisində operativ yerləşdirilməsi üçün zəruri tədbirlər görmək qərarına gəlib", — deyə bəyanatda vurğulanır.

Qeyd olunur ki, tərəflər Səudiyyə Ərəbistanının ərazi bütövlüyünü qorumaq üçün qüvvə və vasitələrin sürətlə köçürülməsini təmin etmək niyyətindədirlər. Birgə bəyanatda vurğulanır ki, bu tədbirlər hərbi inteqrasiyanı və Alyans ölkələrinin xarici təhdidlərə cavab vermək qabiliyyətini artırmağa yönəlib. İclas zamanı tərəflər Məkkə və Mədinəyə hücum cəhdlərini, həmçinin krallığın iqtisadi və mülki obyektlərinə davam edən zərbələri kəskin şəkildə pisləyiblər.

Ankara və İslamabad bir daha təsdiqləyiblər ki, sazişin hər bir iştirakçısının təhlükəsizliyi üç dövlətin kollektiv təhlükəsizliyinin ayrılmaz hissəsidir. Alyansın institusional inkişafı çərçivəsində Pakistanın istefada olan general-leytenantı Nauman Mahmud təşkilatın ilk baş katibi postuna təyin edilib. Onun səlahiyyət müddəti üç il təşkil edəcək.