NƏRİMANOVDA DÖZÜLMƏZ ŞƏRAİT: KÖRPÜ BİNA TİKİNTİ SAKİNLƏRİ TOZ-TORPAĞA MƏHKUM EDİB

Bakının Nərimanov rayonu, İslam Abışov küçəsinin sakinləri uzun müddətdir ki, əsl ekoloji gərginlik və acınacaqlı məişət şəraiti ilə üz-üzə qalıblar. Ərazidə “Körpü Bina Tikinti” MMC tərəfindən həyata keçirilən tunel tikintisi sakinlərin gündəlik həyatını sözün əsl mənasında cəhənnəmə çevirib.

Aylarla uzanan tikinti işləri və ağır texnikanın hərəkəti nəticəsində küçəni bürüyən toz-torpaq normanı dəfələrlə aşır. İsti yay günlərində mənzillərinin pəncərəsini belə aça bilməyən və havasızlıqdan boğulan vətəndaşlar aidiyyəti qurumların bu məsuliyyətsizliyinə kəskin etiraz edirlər.

Şirkət elementar təhlükəsizlik və sanitariya qaydalarını pozur

Ekoloji və tikinti normativlərinə əsasən, bu növ irimiqyaslı işlər zamanı ərazinin mütəmadi olaraq sulanması və anti-toz tədbirlərinin görülməsi birbaşa icraçı şirkətin öhdəliyidir. Lakin “Körpü Bina Tikinti” nəinki bu qaydalara əməl etmir, hətta əraziyə çınqıl qatının döşənməsi kimi sadə addımları belə görməzdən gəlir. Nəticədə yayda quru tozdan boğulan küçə, azca yağış yağan kimi keçilməz palçıq gölməçəsinə çevrilir.

Sakinlər aidiyyəti qurumlardan təcili müdaxilə tələb edirlər

Artıq bir ildən çoxdur davam edən bu biabırçılıq qarşısında Nərimanov Rayon İcra Hakimiyyəti, Ekologiya və Təbii Sərvətlər Nazirliyi və Tikintidə Təhlükəsizliyə Nəzarət Dövlət Agentliyi hələ də sükutunu qoruyur. Sakinlər tələb edirlər ki:

Şirkət tərəfindən ərazinin gün ərzində mütəmadi sulanması təmin edilsin;

Yola təcili olaraq çınqıl səpilsin və tozun ətrafa yayılmasının qarşısı alınsın;

Əraziyə cavabdeh olan dövlət qurumları icraçı şirkətin fəaliyyətini nəzarətə götürsün və qanunvericiliyi pozduğu üçün adekvat tədbirlər görsün.

Məsələ ilə bağlı adıçəkilən tikinti şirkətinin və aidiyyəti qurumların mövqeyini dərc etməyə hazır olsaq da, reallıq dəyişmir: İslam Abışov küçəsinin sakinləri artıq vədlər yox, konkret və təcili əməli addımlar gözləyirlər